8月3日晚，小怡與伊沙貝主持某學校在長洲某營地的觀星營，是日早上天空一片蔚藍，雖然之前兩日(7月31日及8月1日)也是一樣，小怡與一眾天文匯好友也把握機會到大嶼山觀星，不過今天卻與別不同，天空萬里無雲，早兩三日的積雲也不見了，小怡亦近年難得一見在講座過後，慢條斯理在天台向學生介紹星座，無需像平時一邊主持講座，一邊擔心起雲「食白果」；又或是不斷重複對白如「呢個星座呢粒星暫時俾雲遮住咗」、「呢個星座喺舊雲後面」或者「呢粒星應該喺呢度，不過因為污染睇唔到」！
8月4日早上起身，看見天空依然藍得令人心曠神怡，小怡與細龜打開天文台的「七天天氣預測」網頁，只見8月5日開始橫風橫雨，心想「既然今日係最後機會，不如殺埋佢啦！」於是，細龜在Facebook開了一個緊急event叫一眾好友即晚出動，反應當然係……極差。梗係啦，咁短時間通知，就算好天到好似夏威夷火山頂咁，鬼有人睬你咩！不過，經過一番努力，細龜終於搵到佢個小師妹答應出發。
大概早上10時過後，小怡伸頭出窗外深呼吸……咦……點解有啲乾爽感覺嘅？再望遠一點，只見維港對岸有點灰白，與之前的極度清透的風景大相逕庭，心想冇理由喎，呢類情景只會在秋冬出現！於是再上網睇睇赤立角嘅能見度，嘩！風向由西南變左西北，能見度由50公里直插落十幾公里，唉！
其實自本世紀初，香港的天文愛好者早已留意到香港秋冬季蔚藍的天空逐漸消失，代之而起是受污染的一片灰天，原因是秋季西北風把珠江三角洲一帶的工廠的污染物吹到香港(不少學者對此已有論述，恕小怡不再在此重複)，自此天文愛好者逐漸轉戰夏季──天氣不穩但起碼較秋冬清透，亦大概由2003年開始，出現了「七一效應」，即印象中每年七月一日前後，天氣總是清朗、酷熱。
可惜，清朗的日子越來越少，幾年前在一個講座裡，見過科大大氣研究中心主任劉啟漢教授指著一幅每月能見度低的日數與年份的關係圖(其趨勢是近年加速向上升)，半開玩笑說：「……不過大家唔駛擔心，再上升嘅機會唔大……(他當時是指著28、29的位置)」。他的研究與小怡「路邊社」觀察不謀而合：連夏天出動觀星的次數也越來越少。不過，今年的情況似乎有所改變，起碼踏入六月，晴天的日子多了、七一前後連續幾日好天、甚至八月情況也是一樣，是否終於否極泰來？答案是，當小怡在下午看著能見度的讀數時，心情如睇股票一樣：睇唔通！
小怡做推廣天文的毛病──主觀願望好天──又發作，看見能見度維持20公里左右，心想總好過冬季少於15公里！於是決定出發……結果抵達後不夠一小時就見天頂有星(當然個天係好灰，像冬季一樣)，但遠處地平不斷閃電(奇怪在事後找到天文台的閃電數據是零)，最後在安全要緊的考慮下提早撤退，敗興之餘仲要有隻牛緩慢散步後在我們眼前突然停下「表演」(詳情見下圖，表演內容請自己細心觀察)。唉！
(感謝細龜小師妹Queenie Tsan提供照片)
延伸閱讀：
上月空氣佳 藍天銀河重現 (不過，銀河一向在香港都可見，「重現」一詞並不正確)
Share
Loading tweets...
2 pings