«

»

Jan 02

細龜的天文遊歷記: 天文學會觀星camp(二)

時光倒流至細龜還是F.2的時候...

「尼堂係咩呀?」龜問著鄰座的W。

「EPA呀,龜小朋友,你唔好堂堂都問好嗎?你有寫diary嗎?自己睇diary得唔得呀?」

「咦...邊個教呀?」

這時W很忍無可忍的瞪了龜一眼:「小朋友,你以為我係咩呀?神仙呀?鬼知道邊個教呀!今日喺第一堂呀!!」

正當細龜想說話之際,一陣閃光在課室門口較上位置出現,把我們全都弄盲了。大家還沒來得及喊「救命」,閃光已經消失。隨之而來的是:

“Good morning girls.”

「嘩!發達啦,係雞佬呀!」

「唔怪得頭先個道光咁強啦,下一堂要記得買支白蘭地俾佢。」

全班同學都忘記了要greet這位EPA老師,因為大家都開心無比。而這位人見人愛,車見車載,同學見到開班房門的雞佬,就是天文學會的另一位moderator。順帶一提,他所以名為「雞佬」,是因為他擁有一個跟雞咀一樣凸出來又向下微尖的咀。

他上課的方式跟別的老師很不同,我們很少打開課本乖乖聽書的。雞佬每一堂課都用心為我們準備。有時我們會分組做group discussion,有時他會準備一些時事節目給我們看,或是準備一些從報紙上剪下來的時事新聞跟我們討論,甚至是即興說一些他日常遇到的趣事,再跟我們討論。就好像這一堂:

「你哋應該有去過九龍城食飯呀?喂,一個鐘頭你哋都趕到返來,真喺利害!」

同學們臉上都浮起了笑意,因為大家都知道快有笑話聽。

雞佬接著說:「我都有去過,而且我喺經常去架,因為嗰度嘅小食店實在喺太多好嘢食啦。話說有一日,我如常去到嗰個廣場嘅對面街行吓,睇到有一間賣『牛雜』嘅鋪頭。你哋食過『牛雜』嗎?以後記得千祈唔好食!當時我正想去買番串,就見到街邊有位大嬸用個盤黎洗緊豬腸。睇住佢洗呀洗,洗呀洗,就好似粵語長片裡面嗰d呀乜姐咁用洗衫板努力咁洗。突然盤裡面嘅一條豬腸唔知點解跌左出黎,而又咁啱成條街d坑渠蓋又撬起哂,嗰條豬腸就咁啱跌正落個坑渠裡面!條豬腸就一直順著坑渠向前衝,而嗰位呀嬸就一直喺後面追,仲一路跑一路叫『等陣呀,等陣呀』。結果條豬腸喺交通燈前嘅坑渠口停左。嗰位大嬸立刻一手張佢喺坑渠度撈出來,跑番去佢盤水度,丟番條豬腸落去,再繼續洗呀洗,洗呀洗。」

聽到一半,全班同學都笑得發瘋了,而雞佬也是越說越開心,滿臉通紅。待我們 (包括雞佬)都冷靜下來後,他就開始發問:「你哋覺得衛生署對尼類型食肆嘅監管足夠嗎?」

「其實一d都唔足夠。如果尼次唔係Mr. Kwok你睇到嗰條豬腸嘅話,食左佢嘅人一定會係你啦!」

「哈哈...A,你講得好啱呀,點解你咁了解我嘅?」

「Mr. Kwok,我覺得...」

這一位,就是我們亦師亦友的老師,亦是我們紅磚天文學會的另一位moderator。

Share

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>