「食飽飽，食飽飽，食飽飽就瞓覺覺。」
剛剛過完開心的lunch，又是上課的時候了。這一堂是細龜最怕的physics，執教的老師是呀loo。呀loo是一位很有教學熱誠的好老師，但可惜龜跟physics實在是緣慳一面，對所有跟physics有關的東西都提不起興趣。正無聊地翻著newsletter的細龜，這時被身後的C狠狠地擰了一下手臂。差點痛死的細龜回頭怒目瞪了C一眼，把她手中的circular搶了過來。正翻看著．．．
「咦！天文學會有Christmas camp？！喂P，你去唔去呀？」
「但係我一d都唔識架喎。」
「去到咪識囉，唔係搞個camp黎做乜喎。」
「睇吓先，22-23號，我得喎。好呀，我哋一齊去呀。」
細龜很開心的在circular上填了我兩的大名。
* * *
到了camp的那一天．．．
「咦．．．前面嘅咪係W同埋E？喂喂，你哋好呀！」
「細龜！估到你會黎啦！咦．．．仲有P添喎，梗係俾人捉黎架啦。」
「唔係啦，我都想知道吓係咩咪跟黎睇吓囉。」
這時，雞佬向我們走來：「小朋友，唔好啩住講嘢啦，聽吓president姐姐要講咩啦。」
我們就乖乖的坐好聽president師姐介紹camp的佈局以及整個camp的流程。當我們聽到「現在開始玩數字球」這八個字時，我們四個你眼望我眼，心裡同時浮起同一個疑問：「乜尼個唔係天文camp黎架咩？做咩搞埋哂尼d無鬼聊嘅嘢架！」
雖然腦子裡響起了陳百強哥哥的《喝采》裡的「為什要受苦痛的煎熬」，但耳邊同時響起其他參加者的呼喚「快快走上歡笑的跑道」。勉為其難，我們四個也只好「捨命陪君子」，跟其他人一起跑來跑去。
好不容易終於捱到入黑了。我們四個小朋友以極速九秒九吃完飯後就趕緊跑到旁邊的活動室霸佔有利位置，等待七時正的天文講座。
「滴答．．．滴答．．．滴答．．．」
細龜忍不住了：「喂，而家已經係七點一啦喎，點解仲未有人黎講嘢嘅？」
說時遲，那時快，其他參加者及club officials魚貫地進入活動室。這時雞佬向我們的方向走過來：「小朋友，食得咁快嘅？頭先d嘢唔啱食咩？又無『牛雜』。」
「Mr. K，你仲記得同我哋講過『牛雜』嘅故事嘅？」
「梗係，我講架嘛，哈哈。做乜咁早走過黎呀，講秘密呀，講埋俾我聽呀。」
「唔係呀，我哋等緊聽talk呀，好心急想知今晚會見到d乜嘢星座呀。」
「你真係好有興趣喎，細龜。咁今晚Mr. K就陪你睇足一晚，睇到日出啦！」
細龜這時雙眼發光：「係咪真架，Mr. K？你唔好呃小朋友喎。」
「Mr. K，我哋都要！」
「好啦！今晚一齊睇通宵啦！而家聽talk先。」
President師姐這時已站在台前進行簡介：「各位同學，我哋今日講嘅topic係『黑洞 』。黑洞其實係咩黎架呢？其實就係一顆恆星死左之後呢，就會變成黑洞喇．．．」
十五分鐘之後．．．
「呼嚕．．．呼嚕．．．」
我們這個camp總共有三十位參加者。但talk只過了四分之一，全場的同學都已跑了去找周公子聊天了。連雞佬和Mr. Wong都盯著講台出神。細龜心裡有點納悶：參加的同學們大多連基本的天文物理知識都沒有，officials為什麼會選這一個深奧的topic呢？真是匪夷所思。
一個小時終於過去了，既漫長又沉悶。這時president師姐對我們說：「而家我哋休息十五分鐘，然後有興趣觀星嘅同學請到外面嘅籃球場集合，我哋會係嗰度睇星嘅。記住出黎嗰時帶電筒喎，因為我哋會請camp site嘅人熄左出面嘅燈，咁出面會好黑架。大家過黎嗰時要小心d喎。」
「唉呀呀．．．終於有d似樣嘅嘢做啦。」W一面伸展筋骨一面說。
「咁我哋快d返去拎嘢食出黎啦。」
我們四個小朋友立刻搶閘返回房間搬運物資，然後向籃球場方向跑去。心情興奮的細龜，就像放學後趕回家收看心愛的卡通片的小朋友一樣，不斷吱吱喳喳的說個不停。當我們到達籃球場時，只見雞佬和Mr. Wong正倚著欄杆聊天，我們就立刻跑過去報到。
「小朋友，今日天氣唔係幾好喎。個天有好多雲呀。」
我們舉頭四望，果真是烏雲密佈，大家靜默了一回。這時細龜興奮的說：「都唔緊要啦，我哋可以請Mr. K、Mr. Wong同埋d officials講吓佢哋以前帶camp嘅一d趣事俾我哋聽吓呀。」
同學們聽到龜的提議也立刻精神起來，點頭稱好。
左聊聊，右聊聊，officials們終於跚跚前來。看了一回天，又看了一回四周，其中一位official說：「都無人嘅，我一早都話左佢哋唔會出黎架啦。」
另外一位指了指我們：「唔係呀，尼到有四個喎。」
這時雞佬笑了笑：「咩呀，咩四個呀，係六個呀。我哋兩個係鬼呀。你哋咁鬼耐先出黎架。唔好天喎，有無d咩可以同尼四位小朋友講吓呀，佢哋等左好耐啦。」
一眾officials互望了一回：「無喎，都密哂雲啦，仲有咩好講啫。」
「喂，咁不如我哋返去講鬼故囉。」
這時整隊officials起哄，跟我們草草道別後就頭也不回地走了。剩下我們六個人在漆黑的籃球場裡無所事事。這時Mr. Wong突然呆呆的說起話來：「其實我以前讀民女大學嗰時都有睇星架。嗰時馬鞍山都未起，望出去吐露港真係黑麻麻架。我仲記得嗰時同d一齊住宿嘅同學走出去吐露港邊嗰度睇。天蠍啦、人馬啦、天鷹天琴天鵝都睇到架。嗰時又唔識寶，而家想睇都無地方睇啦。」
「嘩！喂，Simon，真人不露相喎！估唔到你識咁多尼方面嘅嘢架。好心頭先個talk你去講啦。」
這時Mr. Wong有點不好意思的搔搔頭：「你唔好玩啦，我邊有咁好功力呀。佢哋頭先講talk d嘢我都聽唔明。不過真係奇，點解佢哋會揀尼個topic黎講嘅，佢哋知唔知自己講乜架。」
「我都有問過佢哋架。你估呀R點同我講呀，佢話：『無計啦，Mr. K，我都唔係好知尼d係咩黎架，但係天文學會喎，梗係要講d pro d嘅嘢架啦』。咁你話我有乜辦法啫。」
這時細龜實在是忍無可忍要爆發了：「但係咁呀Mr. K，頭先好多同學都瞓左呀。大家都唔知佢係度講乜。我哋四個都只係得F.3，點會識d咁深嘅嘢喎。」
雞佬摸了摸下巴，約有所思地說：「其實天文學會唔應該等於深奧學會呀，我都唔明點解佢哋會有d咁嘅諗法。對我黎講，一個成功嘅學會唔在於同學學到幾多嘢，而係能唔能夠引起同學嘅興趣。d咁technical嘅嘢就等同學自己去發掘啦。好似我上堂都係架，你哋有幾何會見到我拎住本書黎同你哋講得架，好悶架嘛！相反，我講多d日常有趣嘅故仔俾你哋聽，等你哋容易d入腦，上堂又開心，咁咪仲好。」
Mr. Wong也拍了拍雞佬的肩膀：「你講得好啱呀，我都鍾意咁樣上堂。其實我都無專登去講d咩搞笑嘢架，唔知點解佢哋就成日喺度笑。不過見到佢哋咁開心，我都無乜所謂啦。但係細龜．．．」這時Mr. Wong突然很嚴肅的望向我：「你係咪真係photocopier黎架，點解成大段嘢你可以隻字不漏咁背哂出黎嘅？」
細龜笑著搔搔頭，其他同學也笑了起來。
這時，雞佬突然說：「有你哋尼d咁『棧鬼』嘅學生，我哋都教得開心啦！不過唔知可以教幾耐啫。」
同學們都因雞佬的話緊張起來：「點解呀，Mr. K？點解你哋唔要我哋呀？我哋等緊F.4做astron嘅official同你哋一齊搞活動架！」
雞佬無奈的笑了笑：「小朋友，天下無不散之延席。尼d嘢好難講架。」
Mr. Wong也望向細龜：「細龜，你對天文咁有興趣，出年真係考慮吓上astron啦，帶多d有趣嘅知識俾同學仔，等多d同學一齊同你發燒啦。」這時他望望手錶：「喂，好夜啦，又無嘢睇，你哋快d去瞓啦，聽日仲有排玩呀。」
「係．．．」
結果，整個camp的收穫是零。得到如此慘痛經歷的細龜下定決心要在F.4做astron的official，希望一改其頹風。很可惜，就在細龜準備好要燃燒小宇宙之際，雞佬和Mr. Wong都相繼離開學校。後繼的moderator雖然都是很好的老師，但細龜始終還是很想念這兩位絕配moderator的教導，特別是雞佬在camp裡說的一番話更成為細龜日後教導學生的準則。
Share
Loading tweets...