夏威夷之旅(一)

(To: 細龜、阿澧、cK：你地個個都唔出手，係咪等我寫第一篇？？)

今年(2011)夏天，香港的天空顯得份外蔚藍，維持的時間亦較以往長。如果說是政府早年推行的「藍天行動」(還是像「八萬五」般已不再存在？)奏效，倒不如財經評論員說是經濟衰退的先兆？(詳見「藍天白雲在　中小企噩耗」一文)

若果這些一年只得幾日的藍天在去年出現，筆者一早與天文匯一眾朋友到大嶼山睇星睇餐飽。可是，筆者、細龜、阿澧及cK四個懶洋洋，因為……我地已經喺夏威夷睇飽食滯了。(筆者已經見到Bel係後面攞住四個平衡錘準備追殺我地四個……)

我地blog既四位作者，在今年5月尾至6月初到夏威夷旅行，當中有一半時間到了該處的觀星聖地及天文台集中地Mauna Kea(以下簡稱MK，唔係旺角MK！)進行天文攝影及探訪11個大型天文台的其中3個。亦是這個原因，我地個blog自5月後冇乜點更新過。相信截至呢一秒，cK同阿澧依然努力執相中，睇怕你兩個有排都唔駛出文了。(其實筆者都仲執緊……)

筆者與細龜早在2005年跟當地的旅行團到訪過MK，雖然當時只得數小時逗留在山上，在天上的只有慘淡(當然，係同夏天比較……)的春季星空，但同唔可以比較既香港夜空比較，星既數量已經相差N倍，於是當年我地兩個已決定一定要再返黎！可能對住阿澧、cK由朝到晚係咁轟炸夏威夷既星空有幾咁好有幾咁勁，於是筆者呢個「毒品拆家」成功咁令佢地兩個相信「take野，掂硬！(註1)」，極之渴望一嘗「毒品」既滋味。於是講咗幾年，就埋大家既時間，我地呢個「天文匯夏威夷旅行+觀星團」終於在今年5月出發！

由於香港近年越趨嚴重既光污染及空氣污染，筆者自2006年後已甚少再在香港影超廣角既星空，所以今次都好想影下；細龜就話要重溫橫跨南北既銀河；至於阿澧，佢好少有機會影星野；cK就從未影過！於是我地今次盡地一煲，重鎚出擊。為左今次旅程……

筆者買咗一支接近一萬既Nikon 14mm f/2.8D鏡頭、一部改裝咗既Canon 450D同埋一台輕便赤道儀；

阿澧買咗一件18000mAh既鋰電及一支Nikon 20mm f/3.5鏡頭；

cK買咗人生第一部DSLR：Nikon D7000再加一支35mm f/2D鏡；

筆者出發前用咗兩星期計劃四晚星野攝影計劃，以及用赤道儀實習一次模擬現場實況；

筆者既攝影計劃表

細龜出發前考咗車牌；(阿澧同cK係冇既！)

筆者、細龜、阿澧、cK寄艙行李件件接近22kg上限，筆者件手提行李都有11kg；

一團人總共帶左5部DSLR、3部菲林相機、2台赤道儀、4枝三腳架、7枝定焦鏡、3枝變焦鏡同埋3枝雷射筆。

每人都要帶羽絨、毛冷帽、手套、頸巾……(喂，你有冇攪錯，去夏威夷喎！)

阿澧同cK出發前非常興奮，因為係佢地第一次去海外觀星。佢地兩個會唔會「可以一、可以再，向『毒品』說好，向美夢說好」呢？睇多N集大家就會知道了。

部份帶到MK的儀器

非香港讀者：

註1：原文是港府的反吸毒廣告：「take野，衰硬！」

註2：原文是港府的反吸毒廣告：「不可一，不可再；向毒品說不，向惡夢說不。」