«

»

Oct 01

細龜的天文遊歷記:隊長,我係細龜呀!(一)

「媽...呀媽...」

「唔...唔...哇!做乜走左隻鬼入黎架?」

「唔係呀!我係龜呀!」

「撞鬼你咩!晨咁早飄入人哋間房度,想嚇死人咩?」

「我瞓唔著呀...」

「你隻野,三更半夜都唔瞓,而家又晨咁早起身,你唔駛瞓架?」

「唔係呀,今日放榜呀...點瞓呀...」

「你因為放榜瞓唔著?你隻野前幾日仲係度睇卡通片睇到『咔咔聲』咁笑,你識個『驚』字點寫架咩?」

「識呀,琴晚煲『不思議』(係咩黎?自己諗啦!)個時瞓鬼著左,發夢見到自己今朝唔知醒起身返學攞成績呀。你話我驚唔驚呀?」

「你真係...上床瞓多陣啦,咁鬼早返學校都係企係門口度等架啦。」

「哦...」

 

以上就是細龜在中五會考當天跟龜媽的對話,時間是清晨五時正...

 

*                                  *                                  *

 

「鈴...鈴...」

「唔... 撳熄個鬧鐘呀,唔該...」

「起身呀,臭龜!上堂啦!起身呀!!!」

「乜今日咁早就天光嘅?臭肉高,點解你會係我屋企嘅?」

「光你個頭呀,上堂啦!升左F.6仲係咁鬼懶!起身去Bio lab.上堂啦!」

「哦...」

隨著一眾同學移動,身在夢中的細龜亦隨團飄向Bio lab.。不難想像,到達Bio lab.的細龜當然是第一時間向周公子報到。

「細龜!喂,細龜你好起身啦。呀豬(中六之Bio老師也)黎左啦!」

「唔...唔...豬?無星座同豬有關架喎...」

「我係話呀豬黎左呀,要上堂啦!!」

這時細龜才睡眼惺忪的望向蚊:「點解你可以咁精神嘅?你琴晚好早瞓呀?」

「朋友,我早極都唔夠你早啦。趴係個窗台度睇個啲咁the星星睇到三點幾先瞓,我無你咁早瞓。」

「咩啲咁the呀?我見到獵戶座同冬季大三角架。」

「你哺蛋咩?坐係個窗台度坐成晚,都有病架你。」

「你先有病呀,有好嘢都唔睇,死蠢!」

蚊沒好氣回敬龜:「費事理你!唔夠瞓嘅人同動物都會心火盛嘅。我唔同你一般見識。」

「車!」

這時剛榮任astron club president的W鬼鬼祟祟的坐到龜旁邊:「細龜,我想問你,如果今年我哋搞joint school astron camp你黎唔黎呀?」

細龜和蚊奇怪的望了她一眼:「但係學校唔俾搞joint school架喎。你做P無理由唔知架。」

W有些心虛的望向別的地方:「我同Mr. L今個星期六會去個camp site度site visit呀, 你黎唔黎呀?」

細龜搖了搖頭:「唔好意思呀,我星期六有野做去唔到啦。其他official會同你一齊去嗎?」

「我...我未問佢哋呀...等間問。」

對話後大家就相安無事的繼續上堂。

*                                              *                                              *

鏡頭一轉,現在已經是十一月中了。龜,依然是一隻懶到出汁的龜。

某天早上...

「哇...搞咩呀,今日咁鬼凍嘅!而家先至十一月咋喎,幾時捱到出年呀?」

「z...z...」

「喂呀,你好起身啦!上堂啦!」

細龜茫然的望了一眼四周:「先生未到呀,瞓多一陣。」

朦朧間,龜聽到W的聲音:「係呀,今年係29-30呀...係大嶼山個女青camp呀...我哋會俾星圖你架,唔駛自己帶...」

星圖?!

如聞佳音的龜立刻彈起:「咩星圖?」

Q沒好氣的看了龜一眼:「有病架!」

龜也怒瞪她一眼:「你先有病!W,你講咩星圖呀?」

「我話今年個astron camp會係十二月嘅廿九至三十號搞。頭先A問我要唔要自備星圖,我話camp個時我哋會俾,唔駛自己帶。」

細龜龜手一伸:「circular呀唔該。」

接過W手中astron camp circular的細龜當然二話不說把自己的大名寫到上面。這時剛巧class rep.正在宣佈clubs的announcement: “Astronomy Club. The Christmas Stargazing Camp will be organized on 29th Dec…咦?張circular呢?」

「哈哈...唔好意思,係我度係我度。大家傳黎睇吓呀。」

無視class rep. 不知第幾次的「視線死光」,龜高興地向其他同學介紹camp當晚會見到的星座。

*                                              *                                              *

今天是十二月二十八日,astron camp之前一天的晚上。

「細龜,你帶定支電筒呀。個度黑麻麻乜都睇唔到會有危險架。帶定電筒呀。」

「唔會架,我哋係個camp site入面架,唔會乜都睇唔到架。」

「帶定啦,你去個度係離島黎架,要搭船架。周圍乜都無,帶定電筒呀。係喎,你要唔要帶d野去食呀?我幫你整d野食帶去呀?個度荒山野嶺黎架,咪你到時肚餓無野食又凍唔得架。係喎,你不如帶左媽咪件大褸去啦,好暖架。你去個度係郊區黎架,乜都無架,帶定件褸有衫加呀嘛。係喎,細龜呀,你要唔要帶埋蚊怕水呀?個度係荒山野嶺黎架,好多蚊架。帶埋支蚊怕水去啦。係喎,不如你帶埋...」

龜媽起初只是給龜一些「意見」,後來更加插一手幫龜執拾。到最後竟收拾到一個大龜殼出來!面對這個裝備足以去一個星期wild camp的背囊,細龜無奈的把東西檢出來,再向仍在喋喋不休的龜媽說:

「媽咪呀,我哋去個度係個camp site黎架,有屋有床有被有飯食架。而且我諗住搭巴士去喎,個度搭船就join唔到d同學架啦。仲有而家咁鬼凍帶蚊怕水去做乜啫?拎去噴d牛咩?」

龜媽突然又驚嚇萬分:「吓?個度有牛架!你千祈唔好著紅色衫呀!咪d牛會衝埋你度架!係喎,不如你帶埋...」

見狀的細龜只好收口不再說話,免得講多錯多。

(哈哈...經過龜媽一連串「喃嘸」後,細龜終於可以出發去camp啦!欲知camp中發生的趣事,請待下回分解)

Share

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>